Beledweyne, 29 Juun 2024 – Ciidamada Jabuuti ee ka tirsan Hawlgalka Ku-meelgaarka ah ee Midowga Afrika ee Soomaaliya (ATMIS) ayaa u dabbaaldegay Maalinta Madaxbanaanida dalkood ee 47aad iyagoo maalintii Khamiista ahayd magaalada Beledweyne ku qabsaday xaflad si heersare ah loo soo agaasimay.
27-ka bisha Juun ee qof walba, Jabuuti waxay u dabbaaldegtaa madaxbanaanidii ay ka qaadatay maamulkii gumeystihii Faransiiska, taas oo ay ka qaadatay 1977.
Taliyaha Qaybta Afaraad ee ATMIS, Gaashaanle Saciid Waaberi Haruur, ayaa khudbadiisa ku ammmaanay Ciidamada Difaaca Qaranka Jabuuti (DNDF) sida ay ugu heellan yihiin iyo wax-ku-biirrintooda ee xorriyadda dalka.
“Waxaan xasuusannahay kuwii naftooda u huray difaaca xorriyadda iyo ilaalinta dhulkeena. Naf-hurnimadooda waxay nagu dhiirigelinaysaa in aan sare u qaadno oo aan u hoggaansanno qiyamka qarankeena ka dhigaya mid weyn,” ayuu yiri.
Wuxuu caddeeyay sida ay ciidanku uga go’an tahay ilaalinta gobanimada dalka iyo adeegooda xirfadeed ee gaarka ah ee hawlgallada nabad-ilaalinta.
“Waa in aanan iloobin in wax ku biirinteenna maanta ay go’aamin doonto mustaqbalkeenna wadajirka ah. Waxaan ku faanaynaa hawsha ilaa hadda la qabtay, waxaanna naga go’an sugidda amniga, xasilloonida iyo nabadda dalka aan walaalaha nahay ee Soomaaliya.,” ayuu xusay Gashaanle Waaberi.
Guddoomiyaha gobolka Hiiraan, Muusa Salaad Wehliye, ayaa xaqiijiyay in ay Ciidamada Qaranka Soomaaliyeed (CQS) u diyaarsan yihiin la wareegista amniga gobolka markay ciidamada Jabuuti ay ku wareejiyaan Saldhigyada Furiimaha Hore, sida qayb ka mid ah wajiga saddexaad ciidamo dhimista ee socda.
“Aniga oo ku hadlaya magaca Dowladda Federaalka ee Soomaaliya (DFS) iyo Dowlad-goboleedka Hirshabeelle, waxaan kuu xaqiijinayaa in aannu jiri doonin amni uu gacanta ka baxayo, Ciidamadeenna Qaranka Soomaaliyeedna waxay diyaar u yihiin in ay la wareegaan mas’uuliyadaha amniga marka Saldhigyada Furiimaha Hore ee Dhowrka ah ee gobolka Hiiraan si rasmi ah loogu soo wareejiyo,” ayuu xusay Guddoomiye Wehliye.
Ciidamada Jabuuti oo Soomaaliya loo keenay in ay ka mid noqdaan ciidamada Midowga Afrika, ayaa iyaga iyo ciidamada Itoobiya waxay ka hawlgalaan Aagga Mas’uuliyadda Qaybta Afaraad ee ATMIS. Ciidamada Jabuuti waxay kaalin mug leh ka qaataan ciribtirka Al-Shabaab iyo dib u soo celinta nabadda iyo xasilloonida gobollada Hiiraan iyo Galgaduud.
Munaasabadda waxaa ka soo qaybgaley mas’uuliyiin sare oo ka tirsan QM, ATMIS, maamul goboleedka Hiiraan iyo wakiillada bulshada degaanka.
